अबिरल वर्षाका कारण मुस्ताङको थोराङपासमा हिमपहिरोमा परी ४ जनाको मृत्यु भएको छ । मृत्यु हुनेमा तीनजना विदेशी पर्यटक र एकजना नेपाली नागरिक रहेका प्रहरीले जनाएको छ ।
मृत्यु हुनेहरुमा दुईजना पोल्याण्डका र एकजना इजरायली पर्यटक छन् । मृतकहरुको नाम नखुलेको सैनिक जनसम्पर्क निर्देशनालयले जानकारी दिएको छ ।
मुस्ताङको पर्यटकीयस्थल थोराङपास जाँदै गरेका ती पर्यटकहरुको दम्क्याम भन्ने स्थानमा बुधबार शव फेला परेको हो । घटनास्थल मनाङ र मुस्ताङको सिमानामा पर्दछ ।
अन्य ३८ जना पर्यटकलाई भने सेनाले सकुशल उद्धार गरेको छ । उनीहरुलाई लिन नेपाली सेनाको हेलिकोप्टर पठाइएको सहायक सैनिक प्रवक्ता निरन्जन श्रेष्ठले जानकारी दिए ।
भारतीय हुदहुद समुद्री आँधीको प्रभावले नेपालको मौसममा परिवर्तन आएपछि हिमाली जिल्लामा भारी हिमपात भएको छ ।
मनाङमा मंगलबारदेखि हिमपहिरोमा पुरिएर ३ जना बेपत्ता भएका छन् । प्रतिकूल मौसमको कारण उनीहरुको खोजी कार्य प्रभावित भएको जिल्ला प्रहरी कार्यालय मनाङले जनाएको छ ।
No comments:
Post a Comment